- Kio estas spamo?
- Ĉu gravas la enhavo de la mesaĝo?
- Kio pri la adresaro de Derk?
- Kiel mi plendu pri spamo?
- Kiel mi ne plendu pri spamo?
- Kion faros la
poŝtestro de la spaminto?
- Sed mi
ne volas ke la spaminto perdu sian retkonekton!
- Pliaj informoj pri spamo: en la
angla
Ĉar «spamado» en la esperantista retkomunumo ŝajne iĝas
problemo, la «Monato» aperigis artikolon pri tio (N-ro 4, 1998) kaj Yves Bellefeuille preparis respondaron pri tio. Malsupre estas iom
redaktita versio de ĉi lasta.
«Spamo» estas ago amase sendi mesaĝon per retpoŝto al homoj kiuj ne petis
ĝin, aŭ amase afiŝi mesaĝon en pluraj forumoj. La nomo venas de la Usona viandaĵo
«Spam», kiun famigis Monty Python. Kompreneble, oni rajtas
amassendi mesaĝon al la abonantoj de dissendolisto, al homoj kiu petis informojn
pri io, ktp.
Unusola mesaĝo ne estas spamo, kia ajn estas ĝia enhavo.
Ĝi tamen povas esti fia pro aliaj kaŭzoj, kompreneble.
«Spamo» estas iu ajn mesaĝo amassendita, sendepende de enhavo. Ofte la
mesaĝo estas komerca, sed spammesaĝoj foje temas pri religio, ĉenleteroj,
petoj ke oni sendu plendojn aŭ salutojn al diversaj homoj, aŭ aliaj
stultaĵoj. La enhavo tamen povas helpi decidi ĉu la spamo estis sendita
pro malico, aŭ pro stulteco kaj naiveco. Tio povas influi la reagon de la
poŝtestro (vidu poste).
Lastatempe aperis spammesaĝoj kiuj misinformas
pri neekzistantaj virusoj, ekz-e «Good Times», «Penpal Greetings»
aŭ «Join the Crew», kun peto ke oni amase plusendu la mesaĝon.
Tiuj avertoj estas ĉiam falsaj; nepre ne plusendu ilin.
La adresaro de Derk Ederveen diras ke ĝi estas «por faciligi rektan
kontakton, ne por grandskala dissendado», kaj ke oni ne uzu ĝin «por sendi
mesaĝon al ĉiuj». Tia amassendado do kontraŭus la eksplicitajn regulojn
de la adresaro, denove senkonsidere de la enhavo. Tamen, se oni plendas pri
spamo (vidu poste), la poŝtestro verŝajne konsideros la ĝeneralan regulon
kontraŭ spamado kiel pli konvinkan argumenton ol la regulojn de la adresaro.
Sendu plendon al postmaster@sistemo.de.la.fiulo. Skribu en la angla,
diru ke vi plendas pri spamo, kaj sendu kopion de la spammesaĝo, kun ties
mesaĝoĉapo (vd poste). Skribu afable; memoru ke la poŝtestro ne kulpas pro
la ago de sia uzanto, kaj via celo supozeble estas ke la poŝtestro helpu
vin, ne ke li koleriĝu kontraŭ vi. Profesiaj spamistoj kaŝas sian
identon por malhelpi ke oni plendu kontraŭ ili. Oni devas legi la tutan
mesaĝoĉapo por malkovri, kiu fakte ĝin sendis. Kun kelkaj poŝtiloj, oni
uzu la ordonon Show all Headers aŭ simile por vidi la
mesaĝoĉapon.
Jen ekzemplo pri tia mesaĝoĉapo:
Received: from VMSrelay4.pcy.mci.net (vmsrelay4.pcy.mci.net
[204.71.0.56]) by mail.storm.ca (8.8.6/8.8.6) with ESMTP id DAA08627;
Sat, 27 Sep 1997 03:52:43 -0400 (EDT)
>From: waynesmail@mci2000.com
Date: Fri, 26 Sep 1997 22:31:38 -0500 (EST)
Subject: FREE!! $20.00's Worth Of Long Distance Phone Cards!!
To: waynesmail@mci2000.com
Reply-to: waynesmail@mci2000.com
Message-id: <>
Comments: Authenticated sender is <waynesmail@mci2000.com>
La linio From asertas ke la sendanto estas ĉe
mci2000.com. Tamen la linio Received montras ke la mesaĝo iris
de mci.net al storm.ca (mia retnodo). Do oni plendu al
postmaster@mci.net.
Ofte la linio Message-ID taŭgas por
determini de kie la mesaĝo estis sendita, sed ĉi tiu spamisto estis ruza
kaj la linio estas malplena.
Vi ankaŭ povas sendi plendon al
via postmaster; eble li blokos la estontajn mesaĝojn de la
spaminto, tiel ke vi ne plu ricevos mesaĝojn de li. Tamen tio prezentas
aliajn problemojn, kaj ne ĉiuj sistemoj ebligas tion. Vi povas demandi al
via poŝtestro ĉu vi sendu al li kopiojn de plendoj pri spamo.
En sia
adresaro, Derk Ederveen petas ke oni informu lin per mallonga mesaĝo se oni
suspektas misuzon de la adresaro per spamado.
Ne reciproku al la spaminto amassendado («poŝtobombado»). Tio estas same
neakceptebla kiel la spamado mem, kaj vi povus perdi vian propran konton.
Ĉiutage homoj perdas sian retkonekton pro spamado. Grandaj servoj kiel
Compuserve kaj America On Line (AOL) publikigas listojn de
kontoj nuligitaj pro spamo. Ofte, la poŝtestro nur admonos la uzanton,
se tiu ne spamis antaŭe, kaj ŝajne agis pro nescio aŭ naivo. Foje oni
volonte konkludos ke la uzanto estis nur naivulo pro la enhavo de la mesaĝo.
Post tiu admono oni kutime ne plu toleros spamon. Pro gravaj spamadoj oni tuj
nuligas konton.
Do, skribu rekte al la spaminto kaj atentigu lin ke amassendado estas misago,
senkonsidere de la enhavo de la mesaĝo. Laŭ mia sperto, tio ofte ne
funkcias, kaj la spaminto respondas ke li rajtis amassendi sian mesaĝon pro
ĝia «graveco», aŭ ĉar li ne sendis komercan mesaĝon, ktp. Tiam oni
tamen devas plendi ĉe la poŝtestro de la spaminto se oni volas malhelpi ke
ĉi tiu spamu denove.
- Fight Spam on the Internet!
- http://spam.abuse.net/spam/
- Lasu's Net Abuse Links
- http://www.cs.helsinki.fi/~wirzeniu/net-abuse.html
- The Net Abuse
FAQ
- http://www.cybernothing.org/faqs/net-abuse-faq.html.
Ankaŭ regule
afiŝata en news:news.admin.net-abuse.bulletins. Yves Bellefeuille
yan@ottawa.com.
Ottawa, Canada
Français / English / Esperanto